Paroles de la chanson Janed ar Wern ( Jeanne le Guern) par Chansons Bretonnes

I

- Teir noz zo n' 'm eus kousket banne,
Henozh na rin ket adarre;

Nag o klevet an naer-wiber
C'hwibanat war vordig ar stêr.

Ha ma lâre dre he c'hwiban:
Na eus dimiñ nemet unan:

'N hini dime gant e c'hrad-vat,
Hag a dispenn dre wall-bennad,

Hag a dispenn dre wall-bennad,
Eus an diaoul a ra kontrad:

A ve eus Doue distag krenn,
Evel ar brank eus ar wezenn;

Eus ar baradoz distag naet,
Evel eus ar blouzenn an ed! -

II

Pa 'z ae Janed 'r Wern da Wengamp,
Da disanzav ar sakramant,

Da zañsal eus ur groaz arc'hant,
Hi rankontr 'n denjentil yaouank:

Hi rankontr 'n denjentil yaouank,
Met 'oa gwisket 'vel peizant;

Un denjentil, oa brav a-walc'h,
'Met oa e dreid 'vel treid ur marc'h.

- Janed ar Wern, din me lâret,
D' bet den yaouank 'c'h eus prometet ?

- Da driwec'h am eus prometet,
Met eus hini n'am eus dalc'het;

Met eus hini n'am eus dalc'het,
C'hwi vo ma hini, mar karet.

Triwec'h kemener 'zo em zi,
Oc'h ober dilhad nevez din;

Oc'h ober dilhad nevez din,
Da vont warc'hoazh da dimeziñ. -

Pa oa an dilhad nevez graet,
Da Janed 'r Wern na blijent ket;

Da Janed 'r Wern na blijent ket,
Dindan he zreid o deus mac'het.

III

An Aerouant a lavare,
'N ti ar Wern kozh pa arrue:

- Roet din skabell d'azezañ,
Mar ben-me mab-kaer en ti-mañ. -

- Mab-kaer en ti-mañ n' vefet ket,
Gwennoù-daoulagad n'oc'h eus ket;

Gwennoù-daoulagad n'oc'h eus ket,

Ho treid a zo 'vel re kezeg! -

- Droug ha mad gant neb a garo,
Mab-kaer en ti-mañ me vezo;

Pa ve ma zreid 'vel re ur c'hi,
Ho merc'h Janedik a zo din. -

- Ma merc'h Janedig n'ho po ket,
Rak ma c'hoñje vo ret kavet. -

- Gant ul lom gwad ma biz-bihan,
'M eus graet kontrad outi d' viken

IV

Kriz 'vije 'r galon na ouelje,
'N ti ar Wern kozh neb a vije,

'Welet 'n dud a eured douget,
Hag ar wreg yaouank o kerzhet;

Hag ar wreg yaouank o kerzhet,
He inkane n'he gouzañv ket.

- Taolet-hi din war lost ma marc'h,
Hemañ hi gouzañvo a-walc'h ! -

Ac'hane neuze n'oe gwelet,
Ken oe oc'h antren er vered.

Dre ma tostae d'an iliz,
Hi oa ken kaer ha fourdeliz;

Pa dro he bizaj d'an aoter,
Hi zo ken kaer hag ar bleun per;

Pa droe he c'hein d'an aoter,
Ez ae du evel Lusifer!

'N aotrou ar person a lâre
Da Janed 'r Wern eno neuze:

- Janed ar Wern, din-me lâret,
Ur pec'hed bennak 'c'h nac'het ? -

- Me n'am eus nac'het nep pec'hed,
Met seizh promesa am eus graet;

Ya, seizh promesa, siwazh din,
Hep eureujiñ da neb-hini ! -

- Janed ar Wern, din-me lâret,
Da biv kentañ 'c'h eus prometet?

- D'Ervoanig 'r Bail, a Vourbriek,
Oa 'r c'hentañ am eus prometet. -

Ar beleg, vel m'hen eus klevet,
War e inkane zo pignet;

War e inkane eo pignet,
Ha da Vourbriek ez eo aet.

- Ervoanik 'r Bail, din-me lâret,
C'hwi zelivrfe 'n ene daonet;

C'hwi zelivrfe 'n ene daonet,
O kemer Janed 'r Wern da bried? -

- Me yel' ganeoc'h lec'h ma karfet,
Hag a ray 'vel ma lavarfet ;

Hag a ray vel ma lavarfet,
'Kemer Janed 'r Wern da bried. -

Janed ar Wern a lavare
Penaos an den-se n'anvee;

Penaos an den-se n'anvee,
Oa ganti an neb a gare.

· . . . . . . . . . . . . . . . . . . .
· . . . . . . . . . . . . . . . . . . .

- Lammet m' mantel diwar ma choug,
Ma loskiñ 'ra vel an tan-broud!

Lammet din ivez ma sei'enn,
Ma se'ienn eured, ma gwalenn;

Ma se'ienn eured, ma gwalenn,
Ma deviñ reont 'vel tan 'n ifern

V

An aerouant a lavare
Eus sonerien 'n eured neuze:

- Sonerien 'n eured, din lâret,
C'hoari-gaer 'zo bet er banket? -

- C'hoari-gaer 'r banket n'eus ket bet,
Janedig ar Wern 'zo kollet. -

- Sonerien 'n eured, din lâret,
Ha c'hwi c'hoantae he gwelet?-

- Ya 'walc'h, me c'houlenn he gwelet,
Met gant n'am bezo droug ebet;

Met gant n'am bezo droug ebet,
Ha ma vin er porched rentet. -

Hag eñ o kregiñ 'barzh e benn,
Hen kas dreist an tier uhel.....

VI

En ifern pa 'z eo arruet,
Janed ar Wern en deus gwelet;

Janed ar Wern en deus gwelet,
'N ur gador ardant azezet ;

'N ur gador ardant azezet,
Dirazi 'r gaoter plom bervet!

Janed ar Wern a lavare
Da soner an eured neuze:

- Dalet ma chapelet bihan,
Ma losk amañ evel an tan !

Lâret d'an Nikolas, ma zad,
Emañ en ifern e gontrad ;

Lâret da Janedig ar Wern,
Emañ he c'hador en Ifern !

Dalet ma chapelet eured.
Roet-hen d'an hini vo 'r porched..... -
. . . . . . . . . . . . . . . . . . . . . .

He chapelet p'eo diskroget,
En puñs an ifern eo fontet,

Hi o krial : - A! yaou ! allas!
Poanioù an ifern a zo bras! -